alashkznews

Әбілқайыр Сқақов Қазақстанның Қырғызстандағы елшісі болып тағайындалды

Президент Қасым-Жомарт Тоқаев дипломатиялық корпуста бірқатар кадрлық өзгеріс жасап, Әбілқайыр Сқақовты Қазақстанның Қырғызстандағы Төтенше және өкілетті елшісі етіп тағайындады. Ол бұл қызметте Рәпіл Жошыбаевтың орнын басты.

Әбілқайыр Сқақов 2020–2022 жылдары Павлодар облысының әкімі болды. Ал 2023 жылдан 2025 жылдың басына дейін Әлеуметтік медициналық сақтандыру қорын басқарды.

Оның қорды басқарған кезеңінде Жоғары аудиторлық палата міндетті әлеуметтік медициналық сақтандыру жүйесі мен қордың қызметіне аудит жүргізіп, ондаған миллиард теңгеге бағаланған қаржылық заңбұзушылықтарды анықтаған. Тексерілген кезеңнің бір бөлігі Сқақов қызметке келгенге дейінгі уақытты қамтығанымен, аудит қорытындыларын қоғам алдында түсіндіру оған жүктелді. 2025 жылдың қаңтарында ол өз өтінішімен қызметінен кеткен.

Жамбыл облысында 4,5 магнитудалы жер сілкінісі болды

10 шілдеге қараған түні Жамбыл облысында магнитудасы 4,5 болатын жер сілкінісі тіркелді.

Бұл туралы Қазақстанның Ұлттық деректер орталығы хабарлады.

Мәліметке сәйкес, жер сілкінісінің ошағы Тараз қаласынан оңтүстік-батысқа қарай 65 шақырым жерде орналасқан.

Маңғыстау облысында теңіз жағасында жоғалып кеткен 18 жастағы Азамат Дүйсехановты іздестіру жұмыстары жалғасуда.

Алдын ала мәлімет бойынша, 7 шілде күні Ақтаудан 48 шақырым жердегі O’Mir курорттық қонақүйі маңында достарымен туған күнін атап өткен жігіт сағат 15:00 шамасында теңіз жағасында жоғалып кеткен.

Іздеу жұмыстарына 53 адам, 6 арнайы техника, 3 жүзу құралы, 10 сүңгуір және 8 дрон жұмылдырылған.

Марқұмның туыстары еріктілерден, дрон операторларынан және қайық иелерінен көмек сұрап отыр. Оқиғаға қатысты қандай да бір ақпарат білетін азаматтар +7 (778) 967-61-23 немесе +7 (775) 985-57-54 нөмірлеріне хабарласа алады.

Бурабайда квадроциклдің аударылуы салдарынан 22 жастағы Астана тұрғыны қаза тапты.

Қайғылы оқиға 7 шілде күні Зеленый Бор мен Бурабай кенттерінің арасындағы жолда болған. Алдын ала мәлімет бойынша, бойжеткен квадроциклді басқара алмай қалып, көлік аударылған. Ол оқиға орнында көз жұмған.

Квадроциклде бірге болған 19 жастағы жолаушы жарақат алып, медициналық көмекке жүгінген.

Аталған факті бойынша қылмыстық іс қозғалды. Қазіргі уақытта тергеу жүргізіліп, квадроциклді жалға беру пунктінің қауіпсіздік талаптарының сақталуы тексеріліп жатыр.

Астанада Олимпиада чемпионы Данияр Елеусін ұсталды

Астанада Олимпиада чемпионы, боксшы Данияр Елеусіннің ұсталғаны туралы ақпарат әлеуметтік желіде тарады.

Полицияның мәліметінше, Toyota Land Cruiser көлігінің жүргізушісі бірнеше автокөлікпен соқтығысып, оқиға орнынан кетіп қалған.

Кейін құқық қорғау қызметкерлері жүргізушіні Достық көшесінде ұстаған. Ведомствоның хабарлауынша, рөлде масаңдық белгілері байқалған 35 жастағы ер адам болған. Жол-көлік оқиғасы салдарынан зардап шеккендер жоқ.

Сондай-ақ полиция заң алдында барлық азаматтың тең екенін атап өтті.

«Жауапкершілік адамның танымалдығына, кәсібіне, қызметіне немесе еңбегіне қарамастан қолданылады. Заңды бұзып, жауапкершіліктен жалтаруға тырысқан кез келген адам заң аясында жауап береді», – деп мәлімдеді полиция.

Айта кетейік, Данияр Елеусін – 2016 жылғы Олимпиада ойындарының чемпионы.

Талғат Алдыбергенов «Қазақстан темір жолы» басшысы қызметінен кетті

Талғат Алдыбергенов «Қазақстан темір жолы» ұлттық компаниясы басқарма төрағасы қызметінен босатылды.

Тиісті шешімді компанияның жалғыз акционері – «Самұрық-Қазына» ұлттық әл-ауқат қоры қабылдады. Ал қордың жалғыз акционері – Қазақстан Үкіметі.

Талғат Алдыбергенов «Қазақстан темір жолын» 2025 жылдың шілде айынан бері басқарған.

Конституциялық сот: Тоқаевтың бұрынғы президенттік мерзімі есепке алынбайды

Қазақстан Республикасының Конституциялық соты жаңа Конституция күшіне енгеннен кейін Президент Қасым-Жомарт Тоқаевтың бұған дейінгі президенттік өкілеттік мерзімі есепке алынбайтынын мәлімдеді.

Соттың түсіндіруінше, 1995 жылғы Конституцияға сәйкес жоғары мемлекеттік лауазым атқарған азаматтар 2026 жылғы Конституция күшіне енгеннен кейін сол қызметтерге қайта сайлана немесе тағайындала алады.

Бұл норма президент лауазымына да қолданылады.

Демек, қолданыстағы құқықтық түсіндіруге сәйкес, Қасым-Жомарт Тоқаев 2029 жылы өтетін президент сайлауына қатыса алады. Егер сайлауда жеңіске жетсе, Конституцияда белгіленгендей, жеті жылдық бір президенттік мерзімге сайлана алады.

Қазақстаннан жанармайды заңсыз әкетуге қарсы бақылау күшейтілді

Енді шекаралас елдердің жүк және жеңіл көліктері Қазақстанға тәулігіне бір реттен артық кіре алмайды.

Сонымен қатар, қосымша отын бактары орнатылған көліктер анықталып жатыр. Жыл басынан бері мұнай өнімдерін заңсыз шығарудың 593 дерегі тіркелді. Ал өткізу бекеттерінде екі тәуліктің ішінде ғана қосымша бактар мен канистрлер арқылы 3 тоннадан астам отынды алып өтудің 61 әрекетінің жолы кесілген.

«ҚазМұнайГаз» басшылығы бір жылда 519 млн теңгеден астам сыйақы алған

«ҚазМұнайГаз» компаниясының мәліметінше, 2025 жылдың қорытындысы бойынша басқарма мүшелеріне жалпы 519 млн 91 мың 79 теңге көлемінде сыйақы төленген.

Компанияның ресми сайтындағы ақпаратқа сәйкес, басқарма құрамында төраға Асхат Хасенов және оның сегіз орынбасары бар. Яғни басқармада барлығы тоғыз адам жұмыс істейді.

Егер жарияланған сома тоғыз мүшеге тең бөлінсе, әрқайсысына жылына салыққа дейін шамамен 57,7 млн теңгеден келеді.

Дегенмен бұл – шартты есеп. Өйткені басқарма мүшелеріне төленген сыйақы мөлшері лауазымы мен өзге де көрсеткіштерге байланысты әртүрлі болуы мүмкін.

Киевке жасалған Ресей шабуылынан қаза тапқандар саны 30-ға жетті

Киевте Ресейдің жаппай әуе шабуылынан қаза тапқандар саны 30 адамға жетті. Осыған байланысты қалада 3 шілде қаралы күн болып жарияланды.

2 шілдеден 3 шілдеге қараған түні Ресей әскері Украина астанасына 70-тен астам зымыран мен шамамен 500 дрон ұшырып, жаппай соққы жасаған.

Экс-депутатқа 2,6 млрд теңге субсидия жымқырды деген айып тағылды

Қарасай аудандық мәслихатының бұрынғы депутаты 2,6 млрд теңге көлеміндегі ауыл шаруашылығы субсидиясын заңсыз иемденді деген күдікке ілінді.

Тергеу нұсқасына сәйкес, күдікті жалған құжаттар әзірлеп, элиталық таңқурай көшеттері сатып алынғандай көрсеткен. Осы схема арқылы 29 шаруа қожалығының атынан заңсыз субсидия рәсімделген.

Тергеу барысында күдіктінің 491 млн теңгені бағалы қағаздарға инвестициялағаны, 400 млн теңгені микроқаржы ұйымы арқылы қолма-қол ақшаға айналдырғаны және 170 млн теңгені Қонаев қаласындағы казинода құмар ойындарға жұмсағаны анықталған.

Қазіргі таңда күдіктілерге тиесілі 4 пәтер, 3 автокөлік, жеке тұрғын үй мен бағалы қағаздарға тыйым салынды. Үш адам қамауға алынып, қылмыстық іс сотқа жолданды.

Қытайда қазақ дәрігері алғаш рет елдің ең жоғары партиялық марапатына ие болды

Қытайда қазақ ұлтынан шыққан дәрігер Ухас Сүлеймен елдің ең жоғары партиялық наградаларының бірі – «1 шілде» орденімен марапатталған алғашқы қазақ атанды. Марапатты оған Қытай Халық Республикасының төрағасы Си Цзиньпин табыстады.

Ухас Сүлеймен 40 жылдан астам уақыт бойы Шыңжаң-Ұйғыр автономиялық ауданындағы шалғай ауылдарда халыққа медициналық көмек көрсетіп келеді. Ол 1975 жылдан бері 100 мыңнан астам адамды емдеп, 3 200-ден астам нәрестенің дүниеге келуіне жәрдемдескен.

Дәрігердің көпжылдық еңбегі мен елдің денсаулық сақтау саласына қосқан үлесі жоғары бағаланып, ол беделді мемлекеттік марапатқа лайық деп танылды.

Reuters агенттігінің мәліметінше, Қазақстан шілде-тамыз айларында Ресейге 50 мың тонна бензин жеткізуі мүмкін.

Агенттік дерегіне сәйкес, Ресейде тәулігіне шамамен 110 мың тонна бензинге сұраныс бар.

Бұл ақпаратқа қатысты Қазақстанның Энергетика министрлігі түсініктеме берді. Ведомствоның хабарлауынша, Ресей тарапынан әзірге ресми өтініш түспеген. Егер мұндай өтініш келіп түссе, мәселе өзара тиімді коммерциялық шарттар негізінде қарастырылуы мүмкін.

Еске салайық, бұған дейін Reuters Мәскеу мен Астананың 50 мың тонна АИ-92 бензинін жеткізу жөнінде келіссөз жүргізіп жатқанын хабарлаған болатын. Алайда сол кезде Қазақстан билігі бұл мәліметті жоққа шығарған еді.

Маусым айында Украина Ресейдің бірнеше мұнай өңдеу зауытына соққы жасағаннан кейін елдің бірқатар өңірінде жанар-жағармай тапшылығы байқалды. Осыған байланысты әлеуметтік желілерде Ресей азаматтарының Қазақстанға жанармай құю үшін келіп, бекеттерде кезекке таласып жатқан видеолары кеңінен тарады.

Қазақстанның Орталық сайлау комиссиясы алдағы Құрылтай сайлауына қатысты сайлау науқанының негізгі кезеңдерін жариялады.

Еске салайық, елімізде жаңа Парламент – Құрылтай сайлауы 23 тамызда өтеді. Сайлау қорытындысы бойынша Құрылтай құрамына 145 депутат сайланып, олар бес жылдық өкілеттік мерзіміне кіріседі.

Сонымен қатар Қазақстанда қазіргі уақытта ресми тіркелген тәуелсіз оппозициялық партия жоқ. Сыншылардың пікірінше, оппозициялық партияларды тіркеу барысында түрлі кедергілер кездеседі: партия жетекшілері қылмыстық жауапкершілікке тартылып, белсенділері сотталып, ал тіркеу құжаттары әртүрлі себептермен қабылданбайды.

Қазақстанда Конституция күні жаңа датаға ауыстырылды

Қазақстанда Конституция күні енді жаңа күнде атап өтіледі. 1 шілдеден бастап күшіне енген жаңа Конституцияға сәйкес, мемлекеттік мереке 15 наурызға ауыстырылды. Бұл күн демалыс күні болып белгіленді.

Осыған дейін Конституция күні жыл сайын 30 тамызда тойланып келген. Енді аталған дата ресми түрде мемлекеттік мерекелер тізімінен шығарылды.

Мемлекет басшысы бірқатар кадрлық өзгеріс жасады

Мемлекет басшысы Қасым-Жомарт Тоқаевтың шешімімен еліміздің мемлекеттік басқару жүйесінде бірқатар кадрлық өзгеріс болды.

Президенттің Жарлығымен Әмірбек Қанатбекұлы Оспанбеков Қазақстан Республикасы Президентінің Қазақстан Республикасы Парламентіндегі Өкілдігінің басшысы қызметінен босатылды.

Сондай-ақ Мемлекет басшысының өкімімен Марат Алмасұлы Әзілханов Қазақстан халқы Ассамблеясы Төрағасының орынбасары және Қазақстан Республикасы Президенті Әкімшілігінің Қазақстан халқы Ассамблеясы хатшылығының меңгерушісі лауазымдарынан босатылды.

Президенттің тағы бір Жарлығымен Ерлан Тынымбайұлы Қарин Қазақстан Республикасы Президенті Әкімшілігі Басшысының бірінші орынбасары болып тағайындалды. Осыған байланысты ол бұрын атқарған қызметінен босатылды.