atamekenbusiness_silkway

Қытайда туристік бум экономика өсімінің жаңа драйверіне айналды

Қытайда туризм мен қызмет көрсету саласы экономиканың негізгі өсу бағыттарының біріне айналып жатыр. Елдің мемлекеттік статистика басқармасының мәліметінше, 2026 жылдың алғашқы төрт айында қызмет көрсету саласындағы бөлшек сауда көлемі 5,6 пайызға өскен. Бұл тауар саудасындағы өсімнен жоғары көрсеткіш.

Әсіресе туризм, көлік, спорт және мәдениет салаларында екі таңбалы өсім тіркелген. Қытай билігі туристік сұранысты арттыру үшін мектептегі көктемгі демалысты енгізіп, туристік ваучерлер таратқан. Соның нәтижесінде Цинмин мерекесі кезінде туристердің шығыны 61 миллиард юаньнан асса, мамыр мерекелерінде бұл көрсеткіш 185 миллиард юаньға жеткен.

Сарапшылардың айтуынша, Қытай тұрғындары енді тек тауар сатып алуға емес, әсер мен эмоция сыйлайтын қызметтерге көбірек ақша жұмсай бастады. 2025 жылы ел ішінде 6,5 миллиардтан астам туристік сапар жасалған. Ал туризмнен түскен табыс 6,3 триллион юаньға жетіп, тарихи рекорд орнатқан.

t.me/atamekenbusiness_silkway

Қытайда 3 минутта қуатталатын автокөлік батареясы таныстырылды

Қытай ғалымдары небәрі 3 минутта қуатталатын жаңа қатты күйдегі литий-металл батареясын таныстырды. Зерттеуді Қытай ғылым академиясының мамандары жүргізген.

Ғалымдардың айтуынша, батареяның энергия сыйымдылығы 451,5 ватт-сағат/килограммға жеткен. Бұл қазіргі көптеген электромобиль аккумуляторларынан екі есе жоғары көрсеткіш. Сонымен қатар жаңа батарея 700 рет қуатталып, разрядталғаннан кейін де сыйымдылығының 81,9 пайызын сақтап қалған.

Жаңа технология арнайы полимер мен қауіпсіз қорғаныс қабатын қолдану арқылы жасалған. Батарея қауіпсіздік сынақтарынан да өткен. Сарапшылардың пікірінше, бұл технология электромобильдердің қуаттау уақытын айтарлықтай қысқартып, саланың дамуына әсер етуі мүмкін.

t.me/atamekenbusiness_silkway

Мемлекет басшысы ҚХР Төрағасына көңіл айту жеделхатын жолдады

Қасым-Жомарт Тоқаев Қытай Халық Республикасының Шаньси өлкесіндегі көмір шахтасында болған газ жарылысы салдарынан көптеген адамның қаза табуына байланысты Си Цзиньпинге және барша Қытай халқына көңіл айтты.

Президент жарақат алғандардың тез арада сауығып кетуіне тілектестігін білдірді.

t.me/atamekenbusiness_silkway

Қытай парламентінің басшысы Қазақстанға келеді

Қытай парламентінің басшысы Чжао Лэцзи 25-30 мамыр аралығында Қазақстанға жұмыс сапарымен келеді. Бұл туралы Xinhua агенттігі хабарлады.

Ресми мәлімет бойынша, сапар Қазақстан Мәжілісінің төрағасы Ерлан Қошановтың шақыруымен өтеді. Сапар аясында екі ел арасындағы парламентаралық ынтымақтастық мәселелері талқылануы мүмкін.

Чжао Лэцзи — Қытай Халық өкілдері жалпы жиналысы Тұрақты комитетінің төрағасы. Бұл орган Қытай парламентінің сессияаралық кезеңдегі ең жоғарғы құрылымы саналады. Қазақстаннан кейін ол Ресейге де барады.

t.me/atamekenbusiness_silkway

ℹ️ Guess Қытай нарығына қайта оралады

Америкалық сән бренді Guess Қытайдағы жұмысын жергілікті серіктеспен бірге қайта бастайды. Компания жаңа серіктес ретінде Ruisi Haishang ұйымын таңдаған.

Бұл шешім Guess Қытайдағы барлық онлайн және офлайн дүкендерін жапқаннан кейін екі ай өткен соң қабылданып отыр. Компания енді Қытай нарығына арналған жеке стратегия әзірлемек. Яғни өнім, маркетинг, сауда және клиентпен жұмыс жергілікті тұтынушыларға бейімделеді.

Ruisi Haishang әйелдер, ерлер және балалар киімін өндіру, тарату және сатуға жауап береді. Сарапшылардың пікірінше, Guess компаниясын серіктестің сауда орталықтарындағы мүмкіндігі мен онлайн брендтерді басқарудағы тәжірибесі қызықтырған.

t.me/atamekenbusiness_silkway

ЕО қытайлық чип өндірушіге салынған санкцияны уақытша алып тастауы мүмкін

Еуроодақ қытайлық жартылай өткізгіш өндіруші компанияны Ресейге қарсы санкциялар тізімінен уақытша шығаруды қарастырып жатыр. Бұл туралы Bloomberg агенттігі хабарлады.

Әңгіме Yangzhou Yangjie Electronic Technology компаниясы туралы болып отыр. Еуропалық автоконцерндер Брюссельге жеткізу тізбегін тез өзгертуге үлгермегенін айтқан. Олардың мәліметінше, қытайлық компаниядан чип сатып алуға тыйым сақталса, қоймадағы бөлшектер бірнеше аптада таусылуы мүмкін.

Қытайлық компанияны санкциядан уақытша босату үшін Еуроодаққа мүше 27 елдің келісімі қажет. Бұған дейін ЕО Ресейге қарсы 20-санкциялар пакетін қабылдап, оған Қытайдың бірнеше ұйымын енгізген еді. Ал Қытайдың Сауда министрлігі бұл шешімге ресми наразылық білдірген.

t.me/atamekenbusiness_silkway

Пәкістан премьер-министрі Қытайға ресми сапармен барады

Пәкістан премьер-министрі Шахбаз Шариф 23–26 мамыр аралығында Қытайға ресми сапармен барады. Сапар Қытай Мемлекеттік кеңесінің премьері Ли Цянның шақыруымен ұйымдастырылып отыр.

Бейжіңде Шахбаз Шариф Қытай Төрағасы Си Цзиньпинмен кездесіп, премьер Ли Цянмен келіссөз жүргізеді. Тараптар екіжақты қарым-қатынас, экономика және өзара қызығушылық тудыратын мәселелерді талқылайды.

Пәкістан премьері сапар барысында Чжэцзян провинциясына да барады. Биыл Қытай мен Пәкістан арасындағы дипломатиялық қатынастың орнағанына 75 жыл толып отыр. Сарапшылар бұл кездесуді екі ел арасындағы маңызды жоғары деңгейдегі келіссөздердің бірі деп бағалап отыр.

t.me/atamekenbusiness_silkway

Қытайда тағы 17 адам футболдан өмір бойына шеттетілді

Қытай футбол қауымдастығы келісілген матчтар, құмар ойындар және жемқорлыққа қатысты жаңа жазалар жариялады. Бұл жолы футбол саласындағы 65 адам жауапқа тартылған.

Олардың 17-сі футболға қатысты кез келген қызметтен өмір бойына шеттетілді. Қалған 48 адам бес жылға дейінгі мерзімге дисквалификация алды. Жазаға тартылғандардың басым бөлігі — кәсіби клубтардың бұрынғы менеджерлері.

Сонымен қатар Гуандун провинциясындағы «Мэйчжоу Хакка» клубына 800 мың юань айыппұл салынды және командадан 6 ұпай шегерілді. Бұған дейін Қытай футбол қауымдастығы екі рет осындай жаппай жаза қолданып, жалпы саны 116 адамды өмір бойына футболдан шеттеткен еді.

t.me/atamekenbusiness_silkway

Күннің басты жаңалықтары

Қытай әлемдік технология нарығына әсер ететін жаңа металл қорын тапты

Oman Air Маскат пен Ташкент арасында тікелей рейс ашады

Қырғызстан мен Өзбекстан шекарасындағы үш бекет енді тәулік бойы ашық болады

Қытай компаниясы Алматыда $300 млн-ға қоқыстан қуат өндіретін зауыт салады

Қытай мобильді төлем бойынша әлемде бірінші орынға шықты

t.me/atamekenbusiness_silkway

Oman Air Маскат пен Ташкент арасында тікелей рейс ашады

2026 жылдың 2 маусымынан бастап Oman Air әуе компаниясы Оман астанасы Маскат пен Ташкент арасында тікелей рейс іске қосады. Бұл туралы Uzbekistan Airports хабарлады.

Рейстер Boeing 737 ұшақтарымен аптасына үш рет — сейсенбі, жұма және сенбі күндері орындалады.

Oman Air — 1993 жылы құрылған Оманның ұлттық әуе компаниясы. Әуе тасымалдаушының паркінде Airbus A330 және Boeing 737, 787 сериясындағы 36 ұшақ бар.

t.me/atamekenbusiness_silkway

Қытай компаниясы Алматыда $300 млн-ға қоқыстан қуат өндіретін зауыт салады

Қытайдың Hunan Junxin Environmental Protection компаниясы Алматыда қоқыс өңдеп, электр қуатын өндіретін зауыт салмақ. Жобаның жалпы құны шамамен 308 миллион долларды құрайды.

Инвестициялық келісімге премьер-министр Олжас Бектенов пен компания басшысы Дай Даого қол қойған. Алматы әкімдігінің мәліметінше, құрылыс 2026 жылдың 29 мамырында басталады. Зауытты екі жыл ішінде іске қосу жоспарланып отыр.

Кәсіпорын тәулігіне 2 мың тонна қалдықты өңдеп, 60 мегаватт электр қуатын өндіреді. Құрылыс кезінде 700 адам жұмысқа тартылады, ал зауыт іске қосылған соң 120 тұрақты жұмыс орны ашылады. Жоба Қытай компаниясының Қырғызстандағы осындай зауыттан кейінгі Орталық Азиядағы кезекті ірі бастамасы болмақ.

t.me/atamekenbusiness_silkway

Қытай Кубаның егемендігін қолдайтынын мәлімдеді

Қытай билігі Кубаның егемендігі мен ұлттық мүддесін қорғауын қолдайтынын мәлімдеді. Бұл туралы Қытай Сыртқы істер министрлігінің ресми өкілі Го Цзякунь айтты.

Мәлімдеме АҚШ-тың Куба революциясының жетекшісі Рауль Кастроға қатысты айыптауынан кейін жасалды. Қытай тарапы Кубаға бағытталған сыртқы қысым мен араласуға қарсы екенін жеткізді.

Го Цзякуньнің сөзінше, Қытай халықаралық құқыққа сәйкес келмейтін және БҰҰ Қауіпсіздік кеңесі бекітпеген біржақты санкцияларды қолдамайды. Бейжің мұндай шектеулерге үнемі қарсы позиция ұстанатынын атап өтті.

t.me/atamekenbusiness_silkway

Қытай мобильді төлем бойынша әлемде бірінші орынға шықты

Қытай мобильді төлем қолдану деңгейі бойынша әлемдік рейтингте көш бастады. Global Payments Report 2026 есебіне сәйкес, 2025 жылы елдегі барлық төлемнің 89 пайызы мобильді қосымшалар арқылы жасалған.

Сарапшылар мұны Alipay мен WeChat Pay жүйелерінің кең таралуымен байланыстырады. Бұл платформалар Қытайда қолма-қол ақша мен банк карталарын біртіндеп ығыстырып шығарған. Әлем бойынша мобильді төлемдердің орташа үлесі 37 пайызды құраған.

Азияның басқа елдерінде де мобильді төлем белсенді өсіп жатыр. Мысалы, Үндістанда бұл көрсеткіш 65 пайызға, Таиландта 56 пайызға, ал Вьетнамда 52 пайызға жеткен. Сарапшылардың болжамынша, 2030 жылға қарай Қытайда мобильді төлем үлесі 94 пайызға дейін өседі.

t.me/atamekenbusiness_silkway

Шетелдік инвесторлар Қытай акцияларына миллиардтаған доллар құйып жатыр

2026 жылдың алғашқы тоқсанында шетелдік инвесторлар Қытай компанияларының акцияларын белсенді түрде сатып ала бастады. Бұл халықаралық инвесторлардың Қытай экономикасына деген сенімі сақталып отырғанын көрсетеді.

Қытайдың «Тун-хуа-шунь» қаржы компаниясының мәліметінше, наурыз айының соңында шетелдік инвесторлар 1500-ден астам қытайлық компанияның ірі акционерлері қатарына кірген. Олардың қолындағы акциялардың жалпы құны 35 миллиард долларға жеткен. Бұл өткен жылдың соңымен салыстырғанда 10 миллиард доллардан астам өсім.

Goldman Sachs банкі 900-ге жуық компанияның акциясын сатып алған. Әсіресе ғарыш технологиясы мен есептеу жүйелеріне қатысты компанияларға қызығушылық жоғары. Сонымен қатар Goldman Sachs пен Morgan Stanley Қытайдың қор нарығына қатысты болжамдарын жақсартып, негізгі индекстердің өсетінін атап өтті.

t.me/atamekenbusiness_silkway

Қытай әлемдік технология нарығына әсер ететін жаңа металл қорын тапты

Қытайдың солтүстік-шығысынан сирек жер металдарының жаңа ірі кен орындары табылды. Сарапшылар бұл жаңалық әлемдік технология нарығына әсер етуі мүмкін екенін айтып отыр. Себебі дәл осы металдар электромобиль, смартфон, аккумулятор, жел генераторы және әскери техника өндірісінде аса маңызды шикізат саналады. Бұл туралы inbusiness.kz хабарлады.

Жаңа қорлар Хэйлунцзян және Цзилинь провинцияларынан анықталған. Қытайлық ғалымдардың айтуынша, бұл кен орындарының ерекшелігі — металдарды өндіру процесі бұрынғыға қарағанда арзан әрі экологияға зияны аз болуы мүмкін. Өйткені жаңа технология күрделі химиялық өңдеуді қажет етпейді.

Қазір Қытай әлемдегі сирек жер металдарын өңдеудің шамамен 90 пайызын бақылап отыр. Ал жаңа кен орындарының ашылуы Бейжіңнің технологиялық және өнеркәсіптік ықпалын одан әрі күшейтуі мүмкін. Бұл жаңалық Қытай мен АҚШ арасында стратегиялық шикізат бойынша келіссөздер жүріп жатқан кезеңде жарияланды.

t.me/atamekenbusiness_silkway

Қырғызстан мен Өзбекстан шекарасындағы үш бекет енді тәулік бойы ашық болады

Қырғызстан Баткен облысындағы Өзбекстанмен шекарада орналасқан «Қадамжай», «Чечме» және «Ақ-Қия» өткізу бекеттерін тәулік бойы жұмыс істеу режиміне ауыстырды.

Жаңа тәртіп жазғы туристік маусымға байланысты енгізілген. Бекеттер 2026 жылдың 1 қазанына дейін 24 сағат жұмыс істейді.

Бұл өткізу пункттері арқылы тек Қырғызстан мен Өзбекстан азаматтары және екі елдің көліктері ғана өте алады.

t.me/atamekenbusiness_silkway

Қытай Медиакорпорациясы футболдан әлем чемпионатының 92 матчын тікелей көрсетеді

2026 жылғы футболдан әлем чемпионатының басталуына бір айдан аз уақыт қалғанда, Қытай медиакорпорациясы турнирді көрсету жоспарын жариялады. Трансляциялар телеарна, радио және онлайн-платформалар арқылы жүргізіледі.

Жоспар бойынша, корпорация әлем чемпионатындағы барлық 92 матчты тікелей эфирде көрсетеді. Сонымен қатар «Мен әлем чемпионатын жақсы көремін» және «Футбол гала-кеші» сияқты арнайы бағдарламалар дайындалған. Эфир барысында футболмен қатар Қытайдың спорт индустриясы мен өндірістік мүмкіндіктері де таныстырылады.

Турнирді көрсету кезінде ЖИ технологиялары кеңінен қолданылады. FIFA бас хатшысы Маттиас Графстрём Қытай медиакорпорациясының техникалық мүмкіндіктеріне жоғары баға берді. 2026 жылғы әлем чемпионаты 11 маусым мен 19 шілде аралығында АҚШ, Канада және Мексикада өтеді.

t.me/atamekenbusiness_silkway

Шэньчжэньде халықаралық мәдени индустрия жәрмеңкесі ашылды

Қытайдың Шэньчжэнь қаласында 22-ші халықаралық мәдени индустрия жәрмеңкесі басталды. Бес күнге созылатын шара Қытай мәдениетінің әлемдегі ықпалы мен елдің мәдени саладағы жетістіктеріне арналған.

Көрмеге 6 мыңнан астам компания мен ұйым онлайн және офлайн форматта қатысып жатыр. Жәрмеңкеде мәдени мұраны қорғау, туризм, спорт, кино, театр және өнер индустриясына қатысты жобалар ұсынылған. Биыл алғаш рет Азия-Тынық мұхиты аймағы елдеріне арналған арнайы алаң ұйымдастырылды.

Сонымен қатар көрмеде трансшекаралық электронды саудаға арналған жаңа бөлім ашылды. Ол Қытайдың мәдени өнімдерін халықаралық нарыққа шығаруға бағытталған. Жеке павильонда Гуандун – Гонконг – Макао Үлкен шығанағы аймағындағы мәдени инновациялар таныстырылып жатыр.

t.me/atamekenbusiness_silkway

«Қытайлық Дакар» раллиінің ең қиын кезеңі аяқталды

Қытайдағы «Такла-Макан – 2026» халықаралық раллиінде жарыстың ең күрделі кезеңі өтті. Қатысушылар Шыңжаң-Ұйғыр автономиялық ауданындағы Айдынкөл маңындағы 468 шақырымдық жолды бағындырды.

Жарыс барысында спортшылар Тянь-Шань шатқалдары, құрғаған өзен арналары мен тасты шөл жолдары арқылы өткен. Кей аймақтарда байланыс болмағандықтан, экипаждар қағаз картаға сүйеніп, бағытты өздері анықтауға мәжбүр болған.

Ұйымдастырушылардың мәліметінше, биылғы ралли тарихтағы ең ұзын маршрутқа айналды. Қатысушылар жалпы 7 500 шақырым жүреді. Сонымен қатар жарыста алғаш рет Қытайда өндірілген октан саны 103 болатын жоғары тиімді жанармай қолданылып жатыр.

t.me/atamekenbusiness_silkway

Күннің басты жаңалықтары

Гонконгте құрылыс алаңдарында темекі шегуге тыйым салынады

Қытайда 26 қабатты тұрғын үй бес күнде салынды

Қазақстанның Қытайға ауыл шаруашылығы экспорты 80%-дан асты

Қытай Қырғызстанға теміржол құрылысына $305 млн бөледі

Қытай Boeing компаниясынан 200 ұшақ сатып алатынын растады

t.me/atamekenbusiness_silkway