buginmedia

ЕУРООДАҚ УКРАИНА МЕН МОЛДОВАНЫҢ МҮШЕЛІККЕ ҚОСЫЛУ КЕЛІССӨЗДЕРІН БАСТАУҒА КЕЛІСТІ

Еуроодаққа мүше барлық мемлекеттер Украина мен Молдованың ұйымға қосылуы жөніндегі келіссөздердің алғашқы кезеңін бастау туралы шешімді қолдады. Бұл туралы Еурокомиссия басшысы Урсула фон дер Ляйен мәлімдеді.

Оның айтуынша, қосылу процесінің негізгі қағидаттарына арналған алғашқы кластер 15 маусымда өтетін Үкіметаралық конференция барысында ашылады. Бұл қадам Украина мен Молдованың Еуроодаққа мүшелік жолындағы маңызды кезеңдердің бірі саналады.

«Украина қажетті қадамдардың бәрін жасап жатыр, және ЕО-ның да өз міндеттемелерін орындап жатқаны өте маңызды. Алғашқы кластердің ашылуы мемлекетіміз бен халқымыз үшін елеулі саяси әрі моральдық қолдау болып табылады», – деді Украина тарапы. Бұл шешім Еуроодақтың екі елмен интеграциялық үдерісті жалғастыруға ниетті екенін көрсетеді.

ИЛОН МАСК ӘЛЕМДЕГІ АЛҒАШҚЫ ТРИЛЛИОНЕР АТАНДЫ

Америкалық кәсіпкер Илон Масктың байлығы 1,1 триллион доллардан асып, ол әлем тарихындағы алғашқы триллионер атанды. Бұған SpaceX компаниясының IPO өткізіп, шамамен 75 миллиард доллар инвестиция тартуы әсер еткен.

Мәліметтерге сәйкес, IPO-ға дейін Масктың жеке капиталы 780 миллиард доллар шамасында болса, жаңа бағалаудан кейін оның SpaceX-тегі үлесінің құны 866 миллиард долларға дейін өскен. Нәтижесінде кәсіпкердің жалпы байлығы 1 триллион долларлық межеден асты.

Алматы қаласының Түрксіб ауданында 12 жастағы Абылайдың өліміне байланысты қылмыстық іс бойынша тергеу жалғасып жатыр. Марқұмның туыстарының айтуынша, оған 13 жастағы екі жасөспірім шабуыл жасаған.

Жақындарының сөзінше, күдіктілер баланың денесіне бірнеше рет пышақ жарақатын салған. Қайғылы оқиғадан кейін Абылай жер қойнына тапсырылды.

Алматы қалалық полиция департаменті оқиғаның балалар арасындағы жанжалдан туындағанын мәлімдеді. Қазіргі таңда қылмыстық іс қозғалып, негізгі күдікті ретінде танылған 13 жастағы жасөспірім арнайы мекемеге орналастырылған. Тергеу амалдары жүргізілуде.

Қайынжұртының өліміне қатысты айып тағылған Сұлтан Сәрсемәлиевке қатысты сот отырысында марқұмдардың мәйіттерін тану және сараптамалық қарау кезінде түсірілген бейнежазбалар зерттелді.

Сотта жарияланған мәліметтерге сәйкес, марқұм Нәсіптің киім қалтасынан невропатолог қабылдауына қатысты құжат табылған. Сонымен қатар оның құлағында сырғасы болғаны анықталған. Сондай-ақ Наурыздың мәйітін қарау барысында тіркелген мән-жайлар көрсетіліп, Мейрамгүлдің денесі қоңыр түсті жамылғыға оралған күйде табылғаны айтылды.

Бұдан бөлек, сот барысында Сұлтан Сәрсемәлиевтің тергеу кезінде оқиға орнына барып, болған жайттарды көрсетіп, тергеушілерге түсініктеме берген сәттері түсірілген бейнежазба да қаралды. Іс бойынша сот процесі жалғасып жатыр.

YouTube-тағы «Қазақтың Абзалы» арнасының авторы Абзал Ибрашев шахматтан әлем чемпионы Бибісара Асаубаеваның Президентке жолдаған үндеуіне қатысты пікір білдірді.

Блогердің айтуынша, қазіргі спортшылар арасында қанағатсыздық күшейіп, патриоттық құндылықтар әлсіреп барады. Ол ел намысын қорғау тек қаржылық қолдаумен өлшенбеуі керек екенін айтып, спортшылардың қоғам алдындағы жауапкершілігіне назар аударды.

Еске салайық, бұған дейін Бибісара Асаубаева халықаралық турнирлерге дайындық пен мамандардың еңбекақысын төлеуде қаржылық қиындықтарға тап болғанын айтып, мемлекеттен қолдау сұраған болатын.

Тоқаев үш заңға қол қойды

Президент Қасым-Жомарт Тоқаев бірқатар заңдарға қол қойды. Олардың қатарында арнаулы мемлекеттік органдардың қызметіне қатысты өзгерістер енгізу, Еуразиялық экономикалық одақтың бірыңғай кедендік транзит жүйесі туралы келісімді ратификациялау және Қазақстан мен Oman арасындағы қосарланған салық салуды болдырмау жөніндегі келісімді бекіту туралы құжаттар бар.

Жаңа заңдар арнаулы мемлекеттік органдар жұмысының құқықтық негіздерін жетілдіруге, халықаралық сауда мен кедендік рәсімдерді оңайлатуға, сондай-ақ Қазақстан мен Оман арасындағы экономикалық ынтымақтастықты нығайтуға бағытталған.

Заңдардың толық мәтіні ресми басылымдарда жарияланады.

«Қазақ жігіттері әлсіреп барады»: Ардақ Назаров қыздардың шетелдіктерге тұрмысқа шығуы туралы пікір айтты

Белгілі спортшы әрі қоғам қайраткері Ардақ Назаров қазақ қоғамындағы өзекті мәселелердің біріне тоқталды. Оның пікірінше, жігіттердің жауапкершілігі, мінез-құлқы мен азаматтық ұстанымы әлсіресе, бұл қазақ қыздарының шетел азаматтарына тұрмысқа шығу үрдісіне әсер етуі мүмкін.

Ардақ Назаров ұлттық құндылықтарды сақтауда ер азаматтардың рөлі маңызды екенін атап өтіп, жастардың тәрбиесі мен отбасылық жауапкершілігіне көбірек көңіл бөлу қажеттігін айтты.

Спортшының бұл пікірі әлеуметтік желілерде қызу талқылануда. Бірі оның көзқарасын қолдаса, енді бірі адамның өмірлік таңдауы ұлтқа емес, жеке бақыт пен өзара сыйластыққа байланысты болуы керек деген пікір білдіруде.

Темірлан ауылында бір жасар қыз бала жеке тұрғын үйдің ауласындағы дала әжетханасына құлап кеткен.

Бала өздігінен шыға алмай қалғандықтан, оқиға орнына құтқарушылар шақырылған.

Жедел жеткен мамандар сәбиді абайлап шығарып алып, медициналық қызметкерлерге тапсырды.

Алдын ала мәлімет бойынша, баланың жағдайы бақылауға алынған. Құтқарушылар ата-аналарды балаларды қараусыз қалдырмауға шақырады.

казахстан

Гүлзира Айдарбекова қоғамдағы өсек пен жеке өмір талқысын сынға алды

Продюсер Гүлзира Айдарбекова марқұм журналист Сәуле Базарханды еске алып, қоғамда өсек-аяң мен біреудің жеке өмірін талқылау көбейіп кеткеніне алаңдаушылық білдірді. Оның айтуынша, бұрын адамдарда бір-біріне деген құрмет көбірек болғанымен, қазіргі әлеуметтік желіде әркімнің өмірі ашық талқыланып кететін жағдай жиілеген.

«Қазір қоғамда өсектен көз ашпайсың. Біреуді жамандау, біреудің жеке өмірін талқылау қалыпты жағдайға айналып бара жатыр», - деді продюсер.

Айдарбекова өз сөзінде адамдарды бір-бірін ғайбаттамауға, әр адамның жеке өміріне құрметпен қарауға шақырды. Оның пікірінше, қоғамның дамуы үшін ең алдымен адамгершілік пен мәдениет деңгейі жоғары болуы керек. Сонымен қатар ол марқұм Сәуле Базарханның ешқашан біреуді жамандап, өсек айтпағанын атап өтіп, сондай тұлғаларды үлгі ету қажеттігін жеткізді.

Жетісу облысының Алакөл аудандық сотында ҚР ҚК-нің 115-1-бабы (сталкинг) және 293-бабының 3-бөлігі (қару қолдану арқылы жасалған бұзақылық) бойынша қоғамдық қауіпті іс-әрекет жасаған азамат К.-ға қатысты медициналық сипаттағы мәжбүрлеу шараларын қолдану туралы қылмыстық іс қаралды.

Сотпен анықталғандай, Алакөл ауданының тұрғыны К. жәбірленуші Ш.-ны бірнеше ай бойы оның еркіне қарсы «Сені сүйемін, жарым болшы» - деп психологиялық зиян, қорқыныш және мазасыздықпен ұштасатын заңсыз қудалау әрекеттері арқылы байланыс орнатуға әрекет жасаған, сондай-ақ, интернет желісіндегі парақшаларын тауып алып, оған тұрақты түрде хабарламалар жолдап, мазасыздық туғызған.

Бұдан бөлек, жергілікті дүкенде жәбірленушіні балағаттап, ар-намысын қорлаған. Осы сәтте, дүкен ішінде тұрған куәгер А. азамат К.-ға ескерту жасап, қызбен олай сөйлеспеуін сұраған. К. алған ескертуге ашуланып, тұрғылықты үйіне барып пышақты алып, дүкенге кері қайтып, қолында тұрған пышақпен А.-ға қарай сермеп, күш қолдану қатерін төндіріп, қоғамдық тәртіпті бұзған.

Сот отырысында жәбірленушілердің айғақтары, куәлардың жауаптары, сараптама қорытындылары және іс материалдары зерттелді.

Кешенді сот-психолого-психиатриялық сараптаманың қорытындысына сәйкес, К. «Параноидты шизофрения» диагнозымен психикалық ауруға шалдыққан. Сарапшылар оның қоғамдық қауіпті іс-әрекеттерді жасаған кезде өз әрекеттерінің нақты сипаты мен қоғамдық қауіптілігін ұғына алмағанын және оларды басқара алмағанын анықтаған.

Осыған байланысты сот К.-ны қылмыстық жауаптылықтан босатып, оған қатысты жалпы үлгідегі психиатриялық стационарда мәжбүрлеп емдеу түріндегі медициналық сипаттағы мәжбүрлеу шарасын тағайындады.

Қаулы заңды күшіне енген жоқ.

«Қызымның атын сұрап жатырсыздар ма?»: Димаш жеке өміріне қатысты қауесеттерге жауап берді

Әнші Димаш Құдайберген Instagram желісіндегі тікелей эфир кезінде жеке өміріне қатысты тараған қауесеттерге қатысты пікір білдірді. Оқырмандардың бірі «қызы» туралы сұрақ қойған сәтте ол әзілмен жауап беріп, мұндай ақпараттың қайдан шыққанын өзі де түсінбейтінін айтты.

Димаштың сөзінше, әлеуметтік желілерде оның отбасы бар, тіпті бірнеше әйелі бар деген әңгімелер жиі тарайды. Алайда әнші қазіргі уақытта бойдақ екенін және бар уақытын шығармашылыққа арнап жүргенін жеткізді.

Сонымен қатар ол болашақта отбасын құрған жағдайда да жеке өмірін көпшілікке жария етпеуді жөн көретінін атап өтті.

Қазақстан футболы қара жамылды: «Елім-Ай» ойыншысы жол апатынан көз жұмды

Көкшетаудың «Елім-Ай» клубының ойыншысы Илья Буртовой Қарағанды – Абай тасжолында болған жол-көлік оқиғасынан кейін қайтыс болды. 29 жастағы футболшы ауыр хәлде ауруханаға жеткізілгенімен, дәрігерлер оның өмірін сақтап қала алмады.

Илья Буртовой кәсіби мансабын «Шахтер-Булат» клубында бастап, кейін футзалдағы «Прогресс» сапында және FC BIRLIK әуесқой командасында өнер көрсетті. 2025 жылы «Елім-Ай» клубының намысын Қазақстан кубогы мен Бірінші лигада қорғаған. Сондай-ақ ол балаларға футболдан тәлім берген «Скаут» клубының жаттықтырушысы болған.