ordaqz

Бұрынғы депутат бюджеттің 2,6 миллиард субсидиясын жымқырып, 170 миллионды казинода шашқан

Тергеу амалдарына сай, қылмыстық схеманы Алматы облысы Қарасай аудандық мәслихатының бұрынғы депутаты ұйымдастырған. Ауыл шаруашылығы саласындағы тәжірибесі мен мемлекеттік субсидиялау тетіктерін жетік білетін ол бюджет қаражатын заңсыз алудың тұрақты схемасын құрған.

Оны іске асыру үшін ұйымдастырушы өзіне бағынысты кәсіпорындар мен Алматы, Жамбыл және Түркістан облыстарында тіркелген 29 шаруа қожалығын пайдаланған.

Заңсыз алынған субсидияның 491 млн теңгесі қор нарығында операциялар жүргізуге бағытталған. Осы мақсатта күдіктінің жұбайының атына брокерлік шот ашылып, ол арқылы қазақстандық және шетелдік компаниялардың бағалы қағаздары сатып алынған.

Сондай-ақ күдікті ұрланған қаражаттың 170 млн теңгесін Қонаев қаласындағы казинода құмар ойындарға жұмсаған.

Сот санкциясымен күдіктілердің 4 пәтеріне, 3 автокөлігіне, жеке тұрғын үйіне және бағалы қағаздарына тыйым салынды.

Сайт| Instagram | Facebook | YouTube | TikTok

«Төлемесең — масқараңды шығарам»: Шымкентте мемлекеттік қызметкерлерді бопсалады деген күдікпен блогер ұсталды

Шымкентте полиция Instagram желісінде acko.balkybaev атымен танымал блогер Асқат Балқыбаевты ұстады. Ол бопсалау және алаяқтық жасады деген күдікке ілінген.

Блогермен бірге тағы екі адам ұсталды. Қазіргі уақытта тергеу олардың қамауға алыну мәселесін қарастырып жатыр.

Тергеу нұсқасына сәйкес, топ мүшелері адамдардан ақша талап етіп, әлеуметтік желілерде оларды әшкерелейтін бейнематериалдарды жариялаймыз деп қорқытқан.

«Instagram желісінде шамамен 150 мың жазылушысы бар жергілікті блогер үш сыбайласымен бірге кәсіпкерлер мен мемлекеттік қызметкерлерді әдейі бейнежазбаға түсірген. Бұған қызметтегі тәртіптік заңбұзушылықтар мен бизнестегі ықтимал кемшіліктер себеп болған», деп мәлімдеді полиция өкілдері.

Ведомствоның мәліметінше, блогер бұл жазбаларды қысым көрсету құралына айналдырған. Бейнематериалдарды жарияламау үшін ол ақша талап еткен.

Сайт| Instagram | Facebook | YouTube | TikTok

Залал көлемі 72 миллиард теңге: Екі мыңнан астам лауазымды тұлға жауапқа тартылды

ҚР ІІМ азаматтардың құқықтарын қорғау және жәбірленушілерге келтірілген залалды өтеу бағытындағы қылмыстық істерді тергеу кезінде екі мыңнан астам лауазымды тұлға жауапқа тартты.

Қазіргі таңда жыл басынан бері тергеліп жатқан істер бойынша мемлекеттік органдарға, мекемелер мен ұйымдарға шамамен 45 мың ұсыну жолданған.

«Сонымен қатар қайталап қылмыс жасаған шартты түрде сотталған сегіз адам жазасын өтеу үшін бас бостандығынан айыру орындарына жіберілді. Заңсыз қызметпен айналысқан төрт субъектінің жұмысы тоқтатылып, 15 кафе мен түнгі клубтың жұмыс уақытына шектеу қойылды. Мысал ретінде Павлодар қаласындағы лаундж-барлардың бірінің қызметі биылғы қаңтарда болған бұзақылық фактісіне байланысты уақытша тоқтатылды» деп жазылған хабарламада.

Бүгінгі таңда аяқталған қылмыстық істер бойынша залал көлемі 72 млрд теңгеден асып, оның 34 млрд теңгеден астамы өтелген.

Сайт| Instagram | Facebook | YouTube | TikTok

«75-тің хаты»: Қырғызстанда Қамшыбек Тәшиев пен жақтастарына сот үкімі шықты

Қырғызстанның Мемлекеттік ұлттық қауіпсіздік комитетінің бұрынғы басшысы Қамшыбек Тәшиевке сот үкімі шығып, оған төрт жыл мерзімге пробациялық бақылау белгіленді.

Ташиевке билікті күшпен басып алуға дайындалды және қызметтік өкілеттігін асыра пайдаланды деген айып тағылған болатын.

Онымен бірге іс бойынша айыпталғандар қатарында бұрынғы бас прокурор Құрманкұл Зулушев, Жогорку Кенештің экс-спикері Нұрланбек Тұргұнбек уулу, сондай-ақ Тәшиевтің жақтастары Бекболот Талғарбеков, Аалы Қарашев, Эмиль Ұзақбаев, Кұрсан Асанов және Кұрманбек Дыйканбаев бар. Олардың барлығына да төрт жыл мерзімге пробациялық бақылау тағайындалды.

Сот үкіміне сәйкес, айыпталушылардың әрқайсысы төрт жылға бас бостандығынан айырылғанымен, жаза шартты түрде пробациямен алмастырылды. Егер олар пробациялық бақылау талаптарын бұзса, қамауға алынуы мүмкін.

Сайт| Instagram | Facebook | YouTube | TikTok

Жаһандық аптап: Әлемдегі мұхит сулары да қатты ысып жатыр

2026 жылдың маусым айында Әлемдік мұхит бетінің орташа температурасы 21,0 °C-қа жетіп, 2023 және 2024 жылдардағы осы айдың рекордтық көрсеткіштерінен (шамамен 20,9 °C) асып түсті.

Бұл туралы Еуропалық климаттық қызмет — Copernicus Marine Service дерегінде жазылған. Жалпы алғанда, 2026 жылдың алғашқы жартысында мұхиттың орташа температурасы 20,94 °C болды. Бұл — бақылаулар тарихындағы екінші ең жоғары көрсеткіш (2024 жылғы шамамен 21,04 °C рекордынан сәл төмен).

Мамандардың айтуынша, теңіздегі жылу толқындары осы кезең бойы таралып, Әлемдік мұхит акваториясының шамамен 82%-ын қамтыған. Ең айқын ауытқулар Жерорта теңізі, Солтүстік Атлант және экваторлық Тынық мұхитында тіркелді.

Copernicus мамандары мұндай көрсеткіштер мұхиттың күйзеліске ұшырағанын көрсететінін және климатты үздіксіз бақылау қажет екенін атады.

Температураның көтерілуі мұхиттың көмірқышқыл газын (CO₂) сіңіру қабілетін азайтады.

Сайт| Instagram | Facebook | YouTube | TikTok

Франция жұрты кондиционерге таласып, жаппай төбелесіп, дүкендерге басып кіріп жатыр

Аптап ыстықтың күшеюіне байланысты Францияда кондиционер мен желдеткіш сатып алу барысында жанжал шығып, соңы жаппай төбелеске айналды.

Lidl дүкендер желісі 200 мың дана климаттық техника сатылымға шығарылғанын жариялағаннан кейін, дүкендерде ұзын-сонар кезек пен адам кептелісі қалыптасты.

Нантер қаласының маңында жүзден астам адам дүкенге басып кіріп, есігін бүлдірген. Сен-Жермен-ан-Ле қаласында сөрелер бірнеше минуттың ішінде босап қалған.

Париждегі дүкендердің біріне 400 адамға небәрі екі кондиционер ғана жеткізілген. Бұл сатып алушылардың наразылығын туғызып, тәртіпті қалпына келтіру үшін көзден жас ағызатын газ қолданылған.

Бұл жағдайды саясаткерлер де 2027 жылғы сайлау қарсаңында өз мақсаттарына пайдалануда. Марин Ле Пен елді кондиционерлермен кең көлемде қамтамасыз етуге шақырса, оның қарсыласы Жан-Люк Меланшон мұны мәселені ушықтыратын жалған шешім деп бағалады.

Сайт| Instagram | Facebook | YouTube | TikTok

Президент AD Ports Group басшысымен порттарды дамыту және Транскаспий халықаралық көлік бағыты мәселесін талқылады

Президент жуырда Брюссельге жасаған сапары барысында Еуропалық одақ пен еуропалық бизнес өкілдері Транскаспий халықаралық көлік бағыты арқылы жүк тасымалын ұлғайтуға дайын екенін растағанын айтты. Олар бұл бағытты Азия мен Еуропаны байланыстыратын негізгі көлік дәлізі ретінде бағалаған.

Кездесуде жүк тасымалы саласындағы бірлескен кәсіпорындарды дамытуға және порт инфрақұрылымын жетілдіруге, оның ішінде астық және жүк терминалдарын салуға ерекше назар аударылды. Өз кезегінде Мұхаммед Әл-Шамиси өңірде ұзақ мерзімді стратегиялық ынтымақтастықты дамытуға мүдделі екенін растады.

Сайт| Instagram | Facebook | YouTube | TikTok

Есірткі мен дәрілік препараттарды заңсыз сатумен айналысқан қылмыстық топқа қатысты іс аяқталды

Қазақстанның екі қаласында ауқымды арнайы операция жүргізіліп, ұйымдасқан қылмыстық топтың жетекшісі мен мүшелері сотталды.

Арнайы операция барысында Тараз және Алматы қалаларында полиция қызметкерлері тінту жүргізіп, жүздеген ампула мен таблетканы тәркіледі. Олардың қатарында айналымы қатаң бақылауға алынған «Трамадол», «Тропикамид», «Сомнол» және басқа да дәрілік препараттар болған.

Тергеу мәліметінше, қылмыстық схеманы ұйымдастырған — Тараз қаласының 60 жастағы тұрғыны. Сот оны 17 жылға бас бостандығынан айырды, ал екі сыбайласы әрқайсысы 15 жылға сотталды.

Сайт| Instagram | Facebook | YouTube | TikTok

Үйдің іргетасы ауада ілініп тұр: Қарасай ауданында жергілікті деңгейдегі төтенше жағдай жарияланды

2026 жылғы 2 шілде күні таңғы сағат 06:50 шамасында «Ақсай карьері» ЖШС аумағында Ақсай өзенінің жағалауын су шайып, соның салдарынан карьердің солтүстік-батыс бөлігінде топырақ сырғыған.

Оқиға орын алған бойда тиісті қызметтер жедел түрде жұмылдырылып, апат аймағына жіберілді.

Қауіпсіздік мақсатында жақын маңдағы 9 жеке тұрғын үйдің тұрғындары уақытша қауіпсіз жерге көшірілді. Қазіргі уақытта мамандар аумақты жан-жақты тексеріп, жағдайды тұрақтандыруға бағытталған жұмыстарды жүргізіп жатыр.

Инженерлік және қалпына келтіру жұмыстары кешенді түрде атқарылуда. Жалпы жұмыстарға 19 қызметкер мен 14 арнайы техника тартылған.

Қалыптасқан жағдайды ескере отырып, Қарасай ауданында жергілікті деңгейдегі төтенше жағдай жариялау туралы шешім қабылданды.

Алматы облысының басқа аудандарында жағдай тұрақты.

Сайт| Instagram | Facebook | YouTube | TikTok

Түркістанда сұмдық жол апаты болып, полиция капитаны қаза тапты

Түркістанда жол-көлік оқиғасынан қалалық полиция басқармасы патрульдік полиция батальонының аға инспекторы, капитан Бауыржан Қонысбеков қаза тапты.

Полиция қызметкері қызметтік міндетін атқару барысында болған. Қайғылы оқиғаға Қазақстанның Ішкі істер министрі пікір білдіріп, тұрғындар арасында тараған түрлі нұсқаларға қатысты түсініктеме берді.

Әлеуметтік желілерде тараған кадрларда екі полиция көлігінің қатты зақымданғаны көрінеді. Олардың бірі бағанаға соғылған. Бейнежазбаға қарағанда, кемінде екі полиция қызметкері зардап шеккен, ал екіншісінің жағдайы әзірге белгісіз.

Бейне сипаттамасында апатқа қатысқан екінші көлік шамамен сағатына 180 шақырым жылдамдықпен жүргені айтылған.

Әлеуметтік желіде қызметтік көлікті басқарған жүргізуші Тараз көшесінде тыйым салынған бұрылыс жасап, жол қозғалысы ережесін бұзғаны туралы ақпарат таралуда.

Сайт| Instagram | Facebook | YouTube | TikTok

Ақтөбеде ер адамды бірнеше сағат бойы ұрып-соғып, көлігін біреудің атына рәсімдеуді талап еткен

Ақтөбеде бопсалау күдігімен бір топ адам ұсталды.

Ақтөбе облысы ПД-нің ұйымдасқан қылмысқа қарсы күрес басқармасына 38 жастағы қала тұрғыны арызданған. Ол өзін бір топ адамның заңсыз ұстап, мүлкін бопсалағанын айтқан.

«Алдын ала мәлімет бойынша, бес күдікті жәбірленушінің танысына оның банк картасынан ақша аударылды деген сылтаумен, өздеріне тиесілі автокөлікті қайта рәсімдеуді, сондай-ақ ақша беруді талап еткен», деп хабарлады Ақтөбе облысының ПД.

Тергеу нұсқасына сәйкес, күдіктілер ер адамды көлік ішінде заңсыз ұстап, бірнеше сағат бойы оған күш қолданып, заңсыз талаптарын орындатуға мәжбүрлеген.

Ұйымдасқан қылмысқа қарсы күрес басқармасы қызметкерлері арнайы бөлім сарбаздарын тарта отырып жүргізген операция нәтижесінде барлық бес күдікті анықталып, ұсталды.

Бопсалау дерегімен сотқа дейінгі тергеп-тексеру басталды. Күдіктілер уақытша ұстау изоляторына қамалды.

Сайт| Instagram | Facebook | YouTube | TikTok

ҰҚК шекарашылары бір айда заң бұзған бес мыңнан астам адамды ұстады

ҰҚК Шекара қызметі 2026 жылғы маусым айындағы жұмысының қорытындысын шығарды.

Бір ай ішінде шекара маңында Қазақстан заңнамасын бұзған 5281 адам ұсталды. Оның 4493-і — шетел азаматтары.

Сондай-ақ шекарашылар тауарлар мен жүктерді заңсыз тасымалдаудың 1476 фактісінің жолын кесті. Жалпы қаражат — 4,3 млрд теңге.

Анықталған құқықбұзушылықтардың ішінде

есірткіге қатысты 32 факт

қару мен оқ-дәрі тасымалдаудың 66 фактісі

көлемі 45 тоннадан асатын жанар-жағармайды заңсыз тасымалдаудың 708 фактісі

халық тұтынатын тауарлар бойынша 2,1 млрд теңгеден астам қаражат бойынша 489 факт

2,2 млрд теңгеден астам сомаға валютаны заңсыз алып өтудің 181 фактісі бар.

Сонымен қатар Каспий теңізінің акваториясында браконьерліктің 27 фактісінің жолы кесілді. Құқықбұзушылардан 24,7 шақырым браконьерлік ау құралдары және жалпы салмағы 658 келі болатын бекіре тұқымдас балықтың 94 данасы тәркіленді.

Сайт| Instagram | Facebook | YouTube | TikTok

Мбаппенің рекордтық дублі Францияға жеңісті жұлып әперді

Мбаппенің дублі Францияны сенімді жеңіске жеткізді. Килиан Мбаппе бастаған Франция құрамасы Швецияны ірі есеппен жеңіп, әлем чемпионатының 1/8 финалына жолдама алды.

АҚШ-тың Ист-Ратерфорд қаласында өткен кездесу 3:0 есебімен аяқталды.Франция сапынан екі голды Мбаппе соқса, тағы бір голды Брэдли Барколяның еншісінде.

Екі нәтижелі пас берген Майкл Олисе турнирдегі ассисттер саны бойынша (5) көш бастап тұр.

Рекордтар мен тарихи көрсеткіштерге келер болсақ, бұл матч Мбаппе үшін ерекше болды.Ол турнирдегі гол саны бойынша Лионель Месси көрсеткішіне жетті — екеуінде де 6 гол. Әлем чемпионаттары тарихындағы жеке голдары саны 18-ге жетті.

Плей-офф кезеңінде соққан 9 голымен жаңа рекорд орнатты.

Мбаппе қазіргі заманның ең нәтижелі ойыншыларының бірі ретінде өз мәртебесін тағы бір дәлелдеді. Франция ұлттық құрамасы соңғы жылдары тұрақты түрде жоғары деңгейде өнер көрсетіп келеді, 2018 жылы әлем чемпионы атанды.

Сайт| Instagram | Facebook | YouTube | TikTok

ОСК Құрылтай депутаттарын сайлау күнтізбесін бекітті

Күнтізбе Орталық сайлау комиссиясының алғашқы отырысында бекітілді. Мемлекет басшысы жаңа мемлекеттік орган – Құрылтай депутаттары сайлауын 2026 жылғы 23 тамызға тағайындады.

Сайлау науқанының негізгі кезеңдері

1 шілде – сайлауды тағайындау

2 шілдеден 13 шілде сағат 18:00-ге дейін – партиялық тізімдерді ұсыну

23 шілде сағат 18:00-ге дейін – партиялық тізімдерді тіркеу

11 шілдеге дейін – аумақтық сайлау комиссияларының құрамы мен орналасқан жері туралы ақпаратты жариялау

16 шілдеге дейін – учаскелік сайлау комиссия құрамын, сайлау учаскелері шекаралары және сайлау комиссиялары орналасқан жері туралы мәлімет жариялау

23 шілде сағат 18:01-ден 22 тамыз сағат 00:00-ге дейін – сайлауалды үгіт-насихат жүргізу

2 тамыз – сайлаушылар тізімдерін актпен учаскелік сайлау комиссияларына тапсыру

7 тамыздан бастап – сайлаушылар, сайлаушылар тізімінен танысуы

22 тамыз – үнсіздік күні

23 тамыз – дауыс беру

Сайт| Instagram | Facebook | YouTube | TikTok

Құрылтай депутаттарын сайлау кезінде қанша сайлау учаскесі жұмыс істейді?

Орталық сайлау комиссиясы Құрылтай депутаттарын сайлауға 10 мыңнан астам сайлау учаскесін дайындайды. Бұл туралы ОСК мүшесі Азамат Айманақұмов мәлімдеді.

Оның айтуынша, сайлау барысында екі санаттағы учаскелер жұмыс істейді: азаматтардың тұрғылықты жері бойынша және уақытша болатын орындарда.

Ел бойынша барлығы 10 427 сайлау учаскесі жұмыс істейді.

Олардың

9 780 сайлау учаскесі азаматтардың тұрғылықты жері бойынша ашылады

647 сайлау учаскесі уақытша болатын орындарда ұйымдастырылады.

Сайт| Instagram | Facebook | YouTube | TikTok

10 мыңнан астам сайлау учаскесі: ОСК Құрылтай сайлауына жеті партияны жіберді

Орталық сайлау комиссиясы Құрылтай депутаттарын сайлауға қатысатын саяси партиялардың тізімін бекітті.

Дауыс беру 2026 жылғы 23 тамызда өтеді. Сайлауға қатысуға келесі жеті саяси партия жіберілді

«Ақ жол» демократиялық партиясы

Respublica партиясы

«Байтақ» жасылдар партиясы

«Ауыл» партиясы

«Әділет» партиясы

Жалпыұлттық социал-демократиялық партия

Қазақстанның халық партиясы.

«Әділет» партиясы үшін бұл заң шығарушы органға өтетін алғашқы сайлау болмақ. Ал «Байтақ» партиясы 2023 жылғы өткен парламент сайлауына қатысқанымен, сайлаушылардың небәрі 2,3%-ының дауысын жинап, бірде-бір мандатқа ие бола алмаған болатын.

Құрылтай сайлауы пропорционалды жүйе негізінде партиялық тізімдер бойынша өтеді. Жаңа құрамға барлығы 145 депутат енеді.

Сайт| Instagram | Facebook | YouTube | TikTok

Түрген өзенінде су деңгейі көтеріліп, туристер эвакуацияланды

Алматы облысы Еңбекшіқазақ ауданындағы Түрген өзенінде су деңгейі көтерілді. Осыған байланысты Түрген – Ассы автожолын және өзен маңындағы алты киіз үй мен «Түргенсай» демалыс аймағы орналасқан аумақтарды тасқын су басты.

Туристік нысандар мен туристік аймақтарда жүрген демалушылар эвакуацияланды.Тасқын салдарынан қолдан жасалған жаяу жүргіншілер көпірі ішінара бүлінген.

Бұдан бөлек, БАК бойындағы автожолдың 54-шақырымындағы көпірдің су өткізу құрылғысы айналасындағы топырақты су шайып кеткен. Бұл көпір 2024 жылы-ақ апатты деп танылған болатын.

Түрген өзенінің бойында және «Түргенсай» демалыс аймағында демалып жатқан туристерді құтқарушылар көшіргені туралы аудан әкімдігі хабарлады.

«Түрген өзенінің 6–9-шақырым аралығындағы жағалау аумақтарын су басты. Бұл жерде алты киіз үй және «Түргенсай» демалыс аймағы орналасқан. Қолдан жасалған жаяу жүргіншілер көпірі ішінара зақымданды».

Сайт| Instagram | Facebook | YouTube | TikTok

Алматыда еріген қар суы сел болып ағып, көпірді жұлып, жолды шайып кетті

Алматыда ауа-райының қатты ысып көтуі мен соңғы кезде тауға төпеп жауған жауын-шашын салдарынан Алматы маңындағы тау бөктерлерінде қар тез еріп, өзендердегі су деңгейі күрт көтерілді. Сол себепті сел жүріп, қатты су ағыны көпірді жұлып әкетіп, жолды шайып кетті.

Сонымен қатар қала арқылы өтетін Үлкен Алматы өзені әл-Фараби атындағы ҚазҰУ маңындағы жағалаудан асып, тасып жатыр.

Әлеуметтік желілерде тараған бейнежазбаларда су ағыны асфальт жолды да бұзып кеткені көрінеді. Наурызбай ауданындағы өзен маңындағы аумақты су басып, лай, тас және ағаш бұтақтары келген. Жаяу жүргіншілер аймағының бір бөлігі су астында қалған.

Оқиға орнында әскери қызметкерлер мен төтенше жағдайлар қызметінің мамандары кезекшілік атқарып жатыр.

Қазіргі уақытта зардап шеккендер туралы ақпарат жоқ. Ақсай өзені аңғары бойында тұратын тұрғындарды алдын алу мақсатында эвакуациялау жүргізіліп жатқанын жаздық.

Сайт| Instagram | Facebook | YouTube | TikTok

АҚШ Қазақстанға тағы 37 миллиард доллар инвестиция салмақшы

Астанада өткен «Қазақстан — АҚШ» дөңгелек үстелінде Қазақстан америкалық компанияларға инвестиция салудың жаңа бағыттарын ұсынды.

Екі жақ сирек жер металдары, Транскаспий бағыты, жасанды интеллект, финтех, агроөнеркәсіп және бірлескен өндірістер саласындағы жобаларды талқылады.

Келіссөздерге премьер-министрдің орынбасары – Ұлттық экономика министрі Серік Жұманғарин, президенттің АҚШ-пен ынтымақтастық жөніндегі арнайы өкілі Ержан Қазыхан, АҚШ-тың Қазақстандағы дипломатиялық миссиясы басшысының орынбасары Дебора Робинсон, «Атамекен» ҰКП төрағасы Қанат Шарлапаев және АҚШ Сауда палатасының аға вице-президенті Хуш Чокси қатысты.

Қанат Шарлапаевтың айтуынша, америкалық компаниялар тәуелсіз Қазақстанның алғашқы стратегиялық инвесторларының қатарында болған. Қазір екі ел арасындағы ынтымақтастық саудадан технологиялық кооперацияға, өндірісті жергіліктендіруге және бірлескен инвестициялық жобаларға ауысып жатыр.

Сайт| Instagram | Facebook | YouTube | TikTok

Алматыда сел қаупіне байланысты тұрғындарды алдын ала эвакуациялау басталды

Алматы қаласының Наурызбай ауданында Ақсай өзені аңғары бойында тұратын тұрғындарды алдын алу мақсатында эвакуациялау жүргізілуде.

Тұрғындарды уақытша Наурызбай ауданындағы мектеп базасында ұйымдастырылған қабылдау пункттеріне орналастырып жатыр.

ТЖМ мәліметінше, оқиға орнында жедел штаб жұмыс істеп, азаматтық қорғау қызметтері жұмылдырылған. Сондай-ақ 8 (727) 279-22-32 нөмірі бойынша «жедел желі» іске қосылған. Соңғы мәлімет бойынша, төрт өтініш келіп түскен.

Ведомство барлық шаралар жоспарлы түрде өтіп жатқанын және жағдай толық бақылауда екенін атап өтті.

Бұған дейін Наурызбай ауданында сел қаупіне байланысты жергілікті хабарландыру жүйесі қосылған болатын.

Тұрғындардың ұялы телефондарына шұғыл хабарламалар жіберіліп, дауыс күшейткіштер арқылы да ескерту жасалды.Құтқару бөлімшелері, «Қазселденқорғау» мамандары және ТЖД күшейтілген режимге көшірілді.

Сайт| Instagram | Facebook | YouTube | TikTok