zakonkz_kaz

Қазақстан құрамасы семсерлесуден Азия чемпионатының қола жүлдесін жеңіп алды

Үндістанның Нью-Дели қаласында өтіп жатқан Азия чемпионатында Қазақстанның ерлер құрамасы командалық сайыста үздік үштікке енді.

Құраманың табысты өнер көрсетуіне алматылық спортшылар Жанат Нәбиев пен Нұрмұхаммед Жайлыбай, сондай-ақ Артем Саркисян мен Назарбай Саттархан үлкен үлес қосты.

Қазақстандық семсерлесушілер жарыс барысында Иранды (45:33) және Өзбекстанды (45:43) жеңіп, жартылай финалға жолдама алды. Финалға шығу үшін болған кездесуде Оңтүстік Корея құрамасына есе жіберді (34:45).

Ал қола медаль үшін өткен тартысты бәсекеде отандастарымыз Қытай құрамасын 45:44 есебімен ұтып, Азия чемпионатының жүлдегері атанды.

Алматы әкімдігі

Бізге жазыл | zakon.kz

Үндістанда әскери ұшақ апатқа ұшырап, 5 адам қаза тапты

Үндістан әуе күштеріне тиесілі AN-32 әскери-көлік ұшағы Ассам штатындағы Джорхат әуе базасына қону кезінде апатқа ұшырады.

Алдын ала мәлімет бойынша, оқиға сенбі күні таңертең болған. Ұшақ әуе базасының аумағына құлағаннан кейін өрт шыққан.

Оқиға орнына жедел қызметтер жіберіліп, құтқарушылар өртті сөндіру және апат салдарын жою жұмыстарын жүргізді.

Үндістан әуе күштерінің баспасөз қызметі ұшақ бортында болған бес әскери қызметшінің қаза тапқанын хабарлады.

Қазіргі уақытта апаттың нақты себебі белгісіз. Оқиғаға байланысты тергеу басталды.

Ассам штатының бас министрі Химанта Бисва Сарма билік өкілдері әскери ведомствоның ресми қорытындысын күтіп отырғанын мәлімдеді.

AN-32 әскери-көлік ұшағы Үндістан әуе күштерінде жүк пен жеке құрамды тасымалдау үшін кеңінен пайдаланылады. Әсіресе ол таулы аймақтар мен күрделі климаттық жағдайларда ұшу мүмкіндігімен ерекшеленеді.

Бізге жазыл | zakon.kz

ТЖМ шомылу маусымына байланысты ескерту жасады

Шомылу маусымы басталған кезде су айдындарында қауіпсіздік талаптарын сақтау аса маңызды. Қайғылы жағдайлардың алдын алу үшін келесі ережелерді қатаң ұстану қажет

Тек арнайы жабдықталған және рұқсат етілген жағажайларда шомылыңыз

Балаларды су жағасында қараусыз қалдырмаңыз

Мас күйде суға түспеңіз

Белгіленбеген және тереңдігі белгісіз жерлерде шомылмаңыз

Құтқару кеудешелерін және басқа да қауіпсіздік құралдарын пайдаланыңыз

Су көліктерін пайдалану кезінде қауіпсіздік талаптарын сақтаңыз

Қарапайым қауіпсіздік ережелерін сақтау – өз өміріңіз бен жақындарыңыздың өмірін қорғаудың басты кепілі.

Бізге жазыл | zakon.kz

АҚШ пен Иран келісімге келуге жақын

АҚШ пен Иран арасындағы келісім алдағы бір тәулік ішінде рәсімделуі мүмкін. Бұл туралы Пәкістан премьер-министрі мәлімдеді.

Иран Сыртқы істер министрі Аббас Аракчидің айтуынша, тараптар өзара түсіністік туралы меморандумға жақын күндері қол қоюы ықтимал. Құжатта 60 пайызға дейін байытылған уран мәселесін реттеу, Ормуз бұғазына қатысты шектеулерді алып тастау және Иранның бұғатталған активтеріне қол жеткізу тетіктері қарастырылған.

Бұған дейін АҚШ президенті Donald Trump Иранға соққы жасау жоспары тоқтатылғанын және Тегеранмен мәмілеге келуге жақын қалғанын мәлімдеген болатын.

Бізге жазыл | zakon.kz

Маңғыстау облысында полицейлер жолда қиын жағдайға тап болған шетелдік велосаяхатшыға көмектесті

Патрульдік полиция ротасының қызметкерлері Ақтау – Қаламқас автожолының 55-шақырымында жол бойында көмекке мұқтаж азаматты байқап, оған жедел түрде қолдау көрсетті.

Анықталғандай, Венгрия Республикасының азаматы велосипедпен халықаралық саяхат жасап жүрген. Ол сапарын Венгриядан бастап, Қырғызстан арқылы Қазақстанға келіп, әрі қарай Қытай бағытына жол тартқан. Ақтау қаласынан шыққаннан кейін велосаяхатшы жолда қиын жағдайға тап болып, өз бетінше қозғалысын жалғастыра алмай қалған.

Патрульдік полиция қызметкерлері шетелдік азаматтың қасына тоқтап, жағдайын сұрастырған. Оның көмекке мұқтаж екенін анықтаған соң, жолдан өтіп бара жатқан ГАЗель автокөлігін тоқтатып, велосаяхатшыны велосипедімен бірге көлікке отырғызып жіберді. Нәтижесінде азамат Ақтау қаласына қауіпсіз жетті.

Көрсетілген қамқорлық пен жедел әрекет үшін шетелдік турист патрульдік полиция қызметкерлеріне алғыс айтты.

Бізге жазыл | zakon.kz

Мемлекет басшысы Ұлыбритания және Солтүстік Ирландия Біріккен Корольдігінің Королі ІІІ Чарльздің туған күніне байланысты құттықтау хатын жолдады

Қасым-Жомарт Тоқаев қазақ-британ қарым-қатынасының жоғары деңгейде екенін атап өтіп, екі ел арасындағы стратегиялық серіктестіктің одан әрі нығая беретініне сенім білдірді.

Президент Корольдің Біріккен Корольдіктің игілігі жолындағы жоғары мемлекеттік қызметіне табыс, ал достас Ұлыбритания халқына бақ-береке тіледі.

Бізге жазыл | zakon.kz

Шымкентте жылан шағуына байланысты 144 шақырту түскен

Күннің ысуына байланысты Шымкент қаласында жыландар тұрғын үйлер мен аулаларда жиі көріне бастаған. Осыған байланысты құтқарушыларға түсетін шақыртулар саны артқан.

Қалалық төтенше жағдайлар департаментінің мәліметінше, жыл басынан бері жылан шығуына байланысты 144 шақырту тіркелген. Олардың басым бөлігі жеке тұрғын үйлерден түскен.

Мамандар осы кезеңде 91 жыланды ұстап, қауіпсіз аймақтарға жіберген. Ал 53 жағдайда шақырту орнына барған құтқарушылар жыланды таппаған.

Ведомствоның хабарлауынша, қазіргі уақытта жылан шағу деректері тіркелмеген. Сондай-ақ улы жәндіктерге, оның ішінде шаяндарға қатысты шақыртулар болмаған.

Департамент бөлімінің басшысы Ербол Оспанов тұрғындардың көпшілігі жыланның улы немесе улы емес екенін ажырата бермейтінін атап өтті.

Сондықтан мамандар кез келген жағдайда сақтық шараларын сақтап, жылан байқалған жағдайда өз бетінше әрекет етпей, құтқарушыларды шақыруға кеңес береді.

Бізге жазыл | zakon.kz

Алматыда білім және мәдениет саласының үздіктері марапатталды

Алматы қаласы әкімінің орынбасары Абзал Нүкенов бірқатар білім және мәдениет саласы қызметкерлеріне мемлекеттік наградалар табыстады.

Мәдениет саласындағы елеулі еңбегі және Қазақстан Республикасы алдындағы айрықша қызметі үшін «Парасат» орденімен Қазақстан Республикасының еңбек сіңірген қайраткері «МузАрт» тобының әншісі, Сәкен Майғазиев марапатталды. Сондай-ақ әнші Кенжебек Жанәбілов «Құрмет» орденімен наградталды.

Білім беру саласындағы ұзақ жылғы жемісті еңбегі үшін «Құрмет» орденімен Оқу-ағарту министрлігінің «Құрмет» грамотасының және Ыбырай Алтынсарин атындағы төсбелгінің иегері Атығай Бүркітбаевич Бижанов марапатталды.

Сонымен бірге «ТҮРКСОЙ» халықаралық ұйымындағы Қазақстан Республикасының өкілі Нышанкүл Қансейітқызы Қаратаеваға да «Құрмет» ордені табысталды.

Бізге жазыл | zakon.kz

Ақсуда бүлдіршін үшінші қабаттан құлап қайтыс болды

Павлодар облысындағы Ақсу қаласында қайғылы оқиға болды. Үш жасар бала көпқабатты тұрғын үйдің үшінші қабатындағы терезеден құлап кеткен.

Оқиғадан кейін бала шұғыл түрде Ақсу қалалық ауруханасына жеткізіліп, кейін жағдайының ауырлығына байланысты Павлодар облыстық балалар ауруханасына ауыстырылған.

Денсаулық сақтау мекемесінің мәліметінше, жедел жәрдем қызметіне шақырту 11 маусым күні сағат 13:16-да түскен. Дәрігерлер оқиға орнына бірнеше минут ішінде жетіп, алғашқы медициналық көмек көрсеткен.

Өкінішке қарай, бүлдіршін операция кезінде көз жұмған.

Мамандар ата-аналарға қауіпсіздік талаптарын сақтауды, балаларды қараусыз қалдырмауды және терезелерге қорғаныс бекіткіштерін орнатуды ескертеді.

Бізге жазыл | zakon.kz

Вашингтонда "8647" жазуына байланысты федералды тергеу басталды

АҚШ-тағы "8647" сандық комбинациясы қоғамда қайтадан қызу талқылана бастады. Бұған ФБР-дің бұрынғы директоры Джеймс Коми жариялаған фотосурет себеп болған.

Дональд Трамп әкімшілігі бұл тіркесті президентке қатысты ықтимал қауіптің ишарасы ретінде бағаласа, кей сарапшылар "86" сөзінің мейрамхана саласында мәзірден алынған немесе таусылған тауарды білдіретінін айтады. Сондықтан бұл сандық тіркестің нақты мағынасы контекстке байланысты өзгеруі мүмкін.

Ақ үй саяси зорлық-зомбылыққа қатысты кез келген ишараны айыптады. Ал федералды сот бұған дейін "8647" комбинациясының өздігінен қауіп төндірмейтінін мәлімдеп, оны сөз бостандығы аясында қарастырған.

Бізге жазыл | zakon.kz

Каспий теңізінде жасөспірім суға батып кете жаздады

Ақтау қаласының 7А шағын ауданындағы Каспий теңізі жағалауында патрульдеу жүргізу барысында ТЖМ Жедел-құтқару жасағының құтқарушылары 2009 жылы туған жасөспірімді құтқарып қалды.

Жасөспірім шомылуға арналмаған жерде суға түсіп, бата бастады. Екі құтқарушының жедел әрекетінің және жағалауда болған куәгердің көмегінің арқасында жасөспірім дер кезінде судан шығарылды.

ТЖМ қызметкерлері зардап шеккен жасөспірімге алғашқы медициналық көмек көрсетіп, кейін оны жедел медициналық жәрдем бригадасына тапсырды.

Бізге жазыл | zakon.kz

Докторантура бітіргендер енді мектепте де жұмыс істей алады

Енді докторантураны тәмамдаған түлектер міндетті жұмыс өтеу мерзімін мектептерде де өтей алады. Бұл туралы мәжіліс депутаты Асхат Аймағамбетов мәлімдеді.

Бұған дейін докторанттар оқуын аяқтағаннан кейін жоғары оқу орындарында, ғылыми-зерттеу институттарында немесе мемлекеттік органдарда жұмыс істеуге міндетті болатын. Қолданыстағы заңнамаға сәйкес, олардың мектептердегі қызметі міндетті өтеу мерзімі ретінде есептелмеген.

Депутаттың айтуынша, енгізілген өзгерістер мектептер мен білім беру ұйымдарын білікті мамандармен қамтамасыз етуге бағытталған.

«Түлектерге таңдау беріледі. Олар тек жоғары оқу орындарымен шектелмей, орта білім беру саласында да кедергісіз қызмет ете алады. Ондағы жұмыс өтеу мерзімі заңды түрде толық есептеледі. Осы арқылы балаларымыз заманауи зерттеушілерден тікелей дәріс алады», – деп жазды Асхат Аймағамбетов әлеуметтік желідегі парақшасында.

Бізге жазыл | zakon.kz

Геннадий Головкин АҚШ-тағы Халықаралық бокс Даңқ залына қабылдау рәсіміне қатысады

Әйгілі былғары қолғап шебері 11-14 маусым аралығында өтетін салтанатты шараның құрметті қонағы болады. Іс-шара Канастота қаласында ұйымдастырылады.

Айта кетейік, Геннадий Головкин Халықаралық бокс Даңқ залына қабылданған алғашқы қазақстандық кәсіпқой боксшы. Бұл жетістік оның әлемдік бокстағы зор еңбегі мен спорттағы жарқын мансабының жоғары бағаланғанын көрсетеді.

Головкин кәсіпқой рингте 45 жекпе-жек өткізіп, 42 жеңіске жеткен. Оның 37-сін нокаутпен аяқтаған.

Бізге жазыл | zakon.kz

Алматыдағы сауда орталығының қоймасында ер адамды жүк көлігі қағып кетті

Алматыдағы ірі сауда орталықтарының бірінің жер асты қоймасында қайғылы оқиға болды.

Алдын ала мәлімет бойынша, қойма аумағына кіріп келе жатқан «ГАЗель» маркалы жүк көлігі 1980 жылы туған ер адамды қағып кеткен. Оқиға салдарынан көлік жәбірленушіні бірнеше метрге дейін сүйреп апарған.

Ауыр жарақат алған азамат жедел жәрдем қызметі жеткенге дейін оқиға орнында көз жұмды.

Қазіргі уақытта полиция қызметкерлері оқиғаның барлық мән-жайын анықтап жатыр. Оқиға бойынша тиісті тексеру жұмыстары жүргізілуде.

Редакция ресми түсініктеме алу үшін Алматы қалалық полиция департаментіне сұрау жолдады.

Бізге жазыл | zakon.kz

Павлодар облысында студенттер мен оқушылардан ақша бопсалаған күдікті ұсталды

Прокуратураның үйлестіруімен жүзеге асырылып жатқан “Саналы ұрпақ” жобасы аясында ұйымдасқан қылмысқа қарсы күрес бөлімшесінің қызметкерлері оқу орындарындағы бопсалау фактілерінің жолын кесті.

Атап айтқанда, Павлодар қаласында екі оқушы өз қатарластарынан ақша бопсалады деген күдікке ілінді. Олар жәбірленушілерден бағалы заттарын ломбардқа өткізіп, түскен ақшаны беруді талап еткен. Кейбір жағдайларда қысым көрсету үшін әшкерелейтін бейнематериалдар пайдаланылған.

Екібастұз қаласында колледждің кәмелетке толмаған студенті танысымен бірге 50 мың теңге бопсалады деген күдікпен ұсталды. Күдіктілер жәбірленушіні автокөлікпен алып кетіп, оған күш қолданған.

Аталған екі дерек бойынша қылмыстық істер қозғалды.

Бізге жазыл | zakon.kz

Аптаның маңызды жаңалықтарына шолу

Конституциялық сот интернетті уақытша бұғаттау нормасын заңды деп таныды.

Сенат рақымшылық жасау туралы заң жобасын екінші оқылымда қабылдады.

Қазақстанда жалақыны арттыру жұмыстары жалғасады.

Алматы әуежайында есірткі тасымалдамақ болған шетелдік ұсталды.

Футболдан әлем чемпионаты басталды.

Бізге жазыл | zakon.kz

Мемлекет басшысы Ресей Федерациясының Президентіне құттықтау жеделхатын жолдады

Қасым-Жомарт Тоқаев Владимир Путинді аталған елдің мемлекеттік мерекесі – Ресей күнімен құттықтады.

– Қазақстан бауырлас Ресеймен стратегиялық серіктестік және одақтастық рухында дәйекті түрде дамып келе жатқан достық әрі тату көршілік қарым-қатынасты жоғары бағалайды. Сіздің жуырда Қазақстанға жасаған мемлекеттік сапарыңыз айрықша мәнге ие. Оның нәтижесі өзара тиімді ынтымақтастықтың көкжиегін кеңейтіп, ауқымды жобалар мен бастамаларды жүзеге асыруға тың серпін берді. Бірлескен күш-жігеріміздің арқасында Қазақстан мен Ресей арасындағы мемлекетаралық байланыстар алдағы уақытта барлық салада қарқынды дами береді деп сенемін, – делінген жеделхатта.

Қасым-Жомарт Тоқаев Владимир Путиннің Ресей Федерациясының игілігі мен өркендеуі жолындағы жауапты мемлекеттік қызметіне толайым табыс тіледі.

Бізге жазыл | zakon.kz

Алматы зообағындағы ақ аюдың жағдайы жұртты алаңдатты

Әлеуметтік желілерде Алматы хайуанаттар бағындағы ақ аю Пурганың видеосы таралып, көпшіліктің алаңдаушылығын тудырды.

маусым күні ауа температурасы шамамен 30 градусқа жеткен кезде түсірілген. Ол Арктика климатына бейімделген ақ аюдың ыстық ауа райындағы жағдайына назар аударып, қоршаудағы салқындату жүйесінің тиімділігіне күмән келтірген.

Осыған байланысты Алматы зообағы түсініктеме беріп, Пурганың жағдайы мамандар мен ветеринарлық қызметтің тұрақты бақылауында екенін мәлімдеді.

Зообақ өкілдерінің хабарлауынша, жануар үшін барлық қажетті жағдай жасалған. Қоршауда салқын суы үздіксіз айналып тұратын екі бассейн, арнайы салқындату жүйесімен жабдықталған ін-үйшік бар. Сонымен қатар мұз бен қар генераторлары тұрақты түрде пайдаланылады.

Мамандардың айтуынша, ақ аюлардың ыстық күндері қозғалыссыз демалып жатуы қалыпты құбылыс саналады.

Бізге жазыл | zakon.kz

Мемлекет басшысы бірқатар заңға қол қойды

«Қазақстан Республикасының кейбір заңнамалық актілеріне педагог мәртебесі, білім беру, денсаулық сақтау және баланың құқықтарын қорғау мәселелері бойынша өзгерістер мен толықтырулар енгізу туралы» Қазақстан Республикасының Заңына

«Қазақстан Республикасының Әкімшілік құқық бұзушылық туралы кодексіне педагог мәртебесі мәселелері бойынша өзгерістер енгізу туралы» Қазақстан Республикасының Заңына

«Қазақстан Республикасының кейбір заңнамалық актілеріне сыбайлас жемқорлыққа қарсы іс-қимыл мәселелері бойынша өзгерістер мен толықтырулар енгізу туралы» Қазақстан Республикасының Заңына қол қойды

Заңның мәтіні баспасөзде жарияланады.

Бізге жазыл | zakon.kz

Алматы тұрғындары енді үйлерінің маңындағы ақылы автотұраққа көліктерін тегін қоя алады

Алматы әкімдігі мәслихатпен бірлесіп жол қозғалысын ұйымдастырудың жаңа ережелерін әзірледі.

Құжат коммуналдық және жекеменшік автотұрақтардың жұмысын, оның ішінде төлем тәртібі мен жеңілдіктерді реттейді. Жаңа ережеге сәйкес, тұрғындарға үйінен 500 метр радиуста тегін тұрақ қоюға рұқсат беріледі.

Жоба сонымен қатар автокөліктерді эвакуациялау, уақытша сақтау және қайтару тәртібін айқындайды. Бұдан бөлек, арнайы тұрақтарға қойылатын талаптар енгізіліп, самокаттарды пайдалану мен оларды қою ережелері де реттеледі.

Құжат «Ашық НҚА» порталында 25 маусымға дейін қоғамдық талқылауға шығарылған.

Бізге жазыл | zakon.kz